Acçom contra o processo de Bolonha

Companheir@s da Coordenadora colárom umha faixa hoje de manhã no escudo da Universidade de Santiago de Compostela, no Câmpus Sul, exibindo o nosso mais rotundo NOM ao processo de Bolonha, e a todos os planos capitalistas etilizantes, mercantilizadores e espanholizadores que a Uniom Europeia e o Estado Espanhol tem guardados para o estudantado galego. Continuaremos o nosso trabalho diário até que as nossas demandas sejam ouvidas.

Nom ao plano Bolonha!
Nom à mercantilizaçom do ensino!!

Ver mais imagens...

Estudantes violentos ameazan as rúas...

Reproduzimos no blogue da Coordenadora de assembleias um artigo de um companheiro de Farmácia. Recomendamos a sua leitura e difusom!

Na noite do martes 20 de febreiro, tres compañeir@s das asembleas de físicas, farmacia e traballo social fomos retidos pola policía local, que en vista de que portabamos unha vasoira, deduciu que eramos perigos@s. Si, levabamos unha vasoira, e non tiñamos licenza de armas (vaia imprudencia...). A vasoira era obviamente para colar uns cartaces. Pero deberon pensar que iamos atracar un banco.

Ler mais...

Andabamos de camiño ao campus Norte coa intención de colar os últimos cartaces aprobados. Cando vemos que pasa un coche da local e fai unha violenta parada no medio da estrada. Da marcha atrás a grande velocidade (nese momento até me preocupei de mirar se viña un coche detrás, porque a hostia podía ser fina...) nunha grande avenida e montan o paseo dando un volantazo. O resultado: cáelles o tapacubos ante as nosas miradas estupefactas. Eu estaba flipando...

Bon, que baixan e nos preguntan que se imos facer pintadas. Comentámoslles que non, que simplesmente imos colar uns cartaces. "A verlos". Amosámosllelos. Gostan deles e quedan con un. Estiven por dicirlle que se llo asinaba, pero pasei , que non tiñan cara de amigos.

Identificación. Ante a petición (en todo momento educada) dunha razón para a identificación, recibimos un pouco cordial: "porque me da la gana", seguido dun aínda menos cordial: "sólo con verte la cara sé que te tengo que identificar". Dámoslles os DNIs, agás un/ha de nós (que o perdera esa mesma tarde) e tómanlle os dados. Proceden ao rexistro: dúas de nós levabamos mochila. Consideramos que xa é abusivo e soltamos un tímido "Pero tedes dereito...", ao que nos respostan cunha violenta mirada e un clásico de peli de vaqueiros: "a ver: podemos hacerlo por las buenas...". Pasamos de movidas e amosamos as mochilas. Céntranse nuns CDs. Obvian a bomba e o bazoka.

Despois de reternos uns 10 minutos nos que se adicaron a telefonar ao xulgado "por se tiñamos causas pendientes" (por se eramos da ETA), e tocar as pintadas dos arredores por se estaba fresca a pintura (que ben adestrados, estes maderos...) déixannos marchar. Perdónannos a vida. Supoño que non a montaron polo tema de que nos faltaba un DNI porque qué cara se lles quedaría se chegasen á comisaría e lles dixesen aos que alí estivesen: "identificámolos porque levaban unha vasoira...".

Menos mal que a miña liberdade "está salvagardada" por esta xente... Menos mal que están aí, nas rúas para defendernos de... estudantes con vasoiras. Que ben nos protexen... O outro día entereime de que no ano 2006 morreron 1352 traballadoras/es vítimas da mesma precariedade laboral que nos espera cos planos de Boloñas, cos EEESs, coas reformas laborais, cos acordos de negociación colectiva... neste mundo precario. Casi 4 mortos ao día! E estes rexistrando mochilas de perigos@s estudantes rebeldes armad@s con vasoiras! Onde están cando sucede algunha desas mortes evitábeis?

Total: que coartaron a nosa liberdade ambulatoria SEN NENGUNHA XUSTIFICACIÓN (nin tan sequer empezáramos a colar nengún cartaz), incorrendo nun delito: detención ilegal. Pero de denunciármolo, desestimarían a denuncia argüindo que "era un controlo rutinario". Só se trataba de asustarnos un ratiño, ameazándonos con que se colabamos algún cartaz fóra dos espazos destinados para iso (si, os 4 que hai en Compostela) nos ían denunciar. Un problema central na sociedade, a colada de cartaces.


Eu pregúntome: desde cando a policia é un corpo "preventivo"? Seguro que aos de Juventudes Socialistas non os reteñen nen nada cando saen a colar os cartaces para facer campaña para algunha elección desas. Claro, é que unha vez cada catro anos non fai dano. O acontecido non evidencia senón a represión "preventiva" que sofre un/ha moz@ con tan só decidirse a facer algo para protestar contra unha inxustiza. O problema é cando alguén actúa sen agardar por "representantes". Pois, señores maderos, non imos parar.

Liberdade de expresión! Non ao estado policial!
Paremos a mercantilización do ensino!

Acta 7 (14-02-2007)

Acta da VII Xuntanza da Coordenadora de Asembleas da USC

(14-02-07)

Ler mais...

Asisten:

-Física(5)
-Historia(3)
-Dereito(1)
-Traballo Social(2)
-Farmacia(1)
-Bioloxía(1)
-Políticas(1)
-CC. Comunicación(2)

1. Advirte-se a CC. Políticas e a CC. da Comunicación que non desculparon os seus retrasos nesta Xuntanza, e que non é a primeira vez que ambas Asembleas fan perder media hora ás demais. Lamenta-se a ausencia reiterada de Filoloxía.

2. Non houbo resposta da Asemblea da Semana pola Educación Crítica. Rexeita-se reiterar contacto por esta vía -carta-. Iago F. informa que coñece xente dunha Faculdade integrada na "Educación Crítica" onde teñen unha Asemblea en funcionamento Transladará-lles a nosa intención de que participen na Coordenadora.

3. Rolda de Faculdades. A salientar:

-Historia xa está en andamento. Desde o11 de Xaneiro. Andan a pensar na edición dun colante.

-Traballo Social anda nun panfleto.

-CC. da Comunicación anda nuns cartaces e nun colante.

4. Rolda de propostas a aprobar:

-Tema ORA, de Farmacia: Non sae adiante.

A salientar: CC. da Comunicación pensa que se se fixese debería incluír-se unha crítica ao uso do automóbel privado. Os votos en contra centraron-se na falta de prioridade deste tema.

Farmacia di que pensará en replantexar a proposta.

-Esparguetada: Non sae adiante por falta de concreción, polo viciada que está a simboloxía do espagueti e pola frivolización que achan no modelo de acción algunhas Asembleas.

-Documentario: Tan só Dereito e Física responderon á proposta que se fixo ao oferecer dúas persoas para criar o Grupo de Traballo do Documentario. Maria C. pola primeira e Cris pola segunda. As restantes Asembleas desculpan a súa falta neste ponto, mais recoñecen a necesidade de contar con un mínimo de unha persoa comprometida por cada Faculdade. Porén, non se coida especialmente grave este percance pola facilidade de convocar unha xuntanza do Grupo de Traballo á qe respondan todas as Asembleas de Faculdade. Espera-se iniciativa de CC. da Comunicación neste sentido. A proposta, portanto, conta con apoio unánime e interese.

-Tema Concepción Arenal: Sae adiante. Dereito concretiza a proposta, ficando a súa Asemblea encarregada de preparar o material (dúas faixas e unha mesa) para ese día. Chamará-se a algunha xente para o deseño das faixas. Editarán-se volantinas, non muitas por desavinza neste ponto; brochuras en número macizo para reparto durante todo o día nas proximidades da Biblioteca; material editado mais o novo que puder saír editado pola Coordenadora; libros "Mito y realidad sobre el Proceso de Boloña" para vender ao estudantado... Todo isto estaría na mesa informativa, localizada tambén nas proximidades da Biblioteca.

Ás dúas horas puntas determinadas na Xuntanza (unha de mañá e unha de tarde) convoca-se ao conxunto da xente que traballamos na Coordenadora para concentrar-nos por trás dunha faixa. Cumpre falar con colegas para que se unan.

Precisa-se estabelecer quendas de traballo, con 5 persoas por quenda; 6 quendas en todo o día; 2 horas cada quenda. De 9 a 21 horas.

-Proposta Física sobre novas Comisións: A de Información fica constituída por Dáni Cao de Políticas e Sabela de Filoloxía. Deberán encarregar-se de manter actualizada a páxina web con noticias sobre o Proceso de Boloña e a actividade da Coordenadora, etcétera...

A Xurídica fica constituída por Iago B., Maria V. e Maria C. de Dereito e Iago F. de Física. Deberá encarregar-se de aportar unha base teórica e análise da información relativa co Proceso de Boloña e o EEES.

A compañeira de Historia Noela adere á Comisión de Economía da Coordenadora.

-Proposta de Física sobre palestras e concentracións en Marzo-Abril (ver Acta anterior): Unanimidade no apoio.

5. Propostas e obrigacións para a vindeira Xuntanza da Coordenadora (ou previa Xuntanza):

- Precisa-se dunha escada sen falta! (para proposta sobre Concepción Arenal).

-CC. da Comunicación debería ter a iniciativa na realización do documentario. Agarda-se proposta concreta ou convocatoria dun Grupo de Traballo para iniciar as tarefas.

A mais, cada Asemblea de Faculdade debe ir pensando en como se podería envolver a súa Faculdade na realización do documentario: persoas a entrevistar, cousas a gravar, situación a criticar, denuncias...

-Cada Faculdade debe enviar canto antes for posíbel unha listaxe con a xente, integrada ou non dentro da súa Asemblea, que estexa disponíbel para a proposta da Concepción Arenal. Dereito, unha vez recebidas as persoas disponíbeis, editará os horarios distribuíndo a xente. Requere-se rapidez neste asunto para que, se alguén non estivese conforme coa hora que lle corresponder, pudese emendar-se a proposta de Dereito. Isto urxe para antes da Vindeira Xuntanza da Coordenadora.

-Todas as Faculdades deben ir pensando en xente, contactos, para participar nas palestras da segunda quincena de Marzo (ver derradeira proposta do ponto anterior).

-Carlos C. deberá aportar o conxunto de material editado pola Coordenadora (brochuras, cartaces, folletos...) para levar à Mesa informativa da proposta da Concepción Arenal. Un bon número de casa cousa, dependendo da súa capacidade para lle ser dada ao estudantado (mais brochuras do que cartaces e folletos, por exemplo), contando co feito de que a medida que se remate o material se podería fotocopiar máis nas copistarías próximas para fornecer a Mesa.

-Paulo B. fica encarregado de aportar un altofalante.

-As follas de pagamento das persoas que sexan representantes nas súas Faculdades deberán aportar-se para permitir que os gastos circulen a través delas, e non do noso peto (ponto aprobado na Xuntanza número --)

6. A vindeira Xuntanza da Coordenadora fica datada para o día 28 de Febreiro na Faculdade de Historia, Xeografía e Arte.

"Esta és ti em exames. Esta és ti com Bolonha"

Cartaz da Comissom de Agitaçom em pdf e em jpg (premer com o botom direito sobre a ligaçom e "Guardar ligaçom como...").

Acta 6 (31-01-2007)

Acta da VI Coordenadora de Assembleias da USC.

(31-01-07)

Ler mais

Assistem:
-Farmácia (1)
-CC. Políticas (2)
-Direito (1)
-Física (5)
-Trabalho Social (3)
-Biologia (1)
-CC. Comunicaçom (1)

Durante a reuniom, umha pessoa da Semana da Educación Crítica, organizada por estudantes organizad@s de Magistério e CC. da Educaçom, aproveitou que se reuniam o mesmo dia no mesmo prédio para interessar-se pola nossa actividade.

A Assembleia de Direito ficou encarregada de enviar-lhes umha carta oferecendo que se unam à Coordenadora.

Espera-se que respondam.

1) Turnos de Faculdades:

Nada a salientar

2) Votaçons de propostas:

-Regulamento Interno: Aprovado definitivamente com umha modificaçom de estilo de CC. Políticas.

-Colante de CC. da Comunicaçom: Desbotado polo conteúdo sexista. Pede-se às pessoas que fazemos parte da Coordenadora que tentemos evitar simbologia e expressons deste tipo em futuras propostas. CC. Comunicaçom anuncia que reformulará a proposta.

-Feche na Biblioteca Geral: Direito informa que as responsáveis da Biblioteca Geral nom o som dos seus horários. É a Reitoria. Esta vem informando polos meios que nom está disposta a abrir mais tempo a Geral, nem acondicionar mais serviços de bibliotecas porque "som suficientes" (sic). Direito explica que a Assembleia de Faculdade declinou portanto perder o tempo indagando mais. Está clara a postura da Reitoria e as demandas do estudantado.

Isto conduz a umha proposta (ver mais abaixo)

-Cartaz de Farmácia: Aprovado

3)Novas propostas (a debater nas Assembleias):

-Farmácia: Zona ORA da USC. Reivindicar a gratuidade do estacionamento. Pintar de branco linhas azuis.

-Trabalho Social: Se se figer, a esparguetada deveria ser mais combativa, com actos posteriores contundentes. Esperam-se sugestons e opinions das assembleias.

-Ciências da Comunicaçom: Realizaçom dum documentário com entrevistas a decanatos, reitoria, representantes da Conselharia, professorado… acerca do Processo de Bolonha. Avança-se na proposta solicitando que na vindoura Reuniom da Coordenadora, cada Assembleia proponha umha pessoa da sua Assembleia, no mínimo, para criar um grupo de trabalho. Ciências da Comunicaçom tem bastante material ao seu dispor para gravar e demais.

Pretendem também editar crachás.

-Direito: Proposta de "assalto à Biblioteca Conceiçom Arenal". Os pormenores da acçom conhecem-nos as pessoas assistentes à Reuniom. Requereriam-se turnos de 4 pessoas polo menos para atender faixa, mesa de informaçom, e reparto de panfletos.

Ainda, proponhem encerramento na Biblioteca Geral para depois de exames (único momento em que é factível coordenar-nos) exigindo que nom se repitam as fileiras deste mês, e que se assegurem e acondicionem as Bibliotecas para Junho-Julho. Cumpre recolher demandas estudantis a este respeito para editar um panfleto pronto para o dia do encerramento. Contactará-se com os médios para dar-lhe difusom.

-Física: Criaçom dumha Comissom Jurídica que achegue material formativo. Criaçom dumha Comissom de Informaçom interna que dinamize as comunicaçons, quer do web, quer entre nós, quer de nós face ao exterior.

Cumpre reforçar as Comissons já existentes (Economia e Agitaçom) para assegurar o trabalho da Coordenadora.

Ainda, falam da possibilidade de convocarmos concentraçons em Abril, umha por semana, no Cámpus Sul, no Cámpus Norte, na Praça Vermelha e na Zona Velha. Antes, em Março, as duas últimas semanas deveriam preparar-se palestras com convidad@s.

4) Aprova-se em Reuniom que nom nos reunamos sempre em História.

5) As propostas da presente Acta pretendem pôr em marcha, de forma já visível, a Coordenadora. É por tanto mui importante que todas as Assembleias debatam (se for preciso via e-mails por mor da dispersom da gente em exames) e se posicionem, assim como ter a maior presença possível de Assembleias na vindoura Coordenadora, onde se espera que se concretizem as propostas desta VI Reuniom e se organizem acçons específicas.

6) A Comissom de Agitaçom deve pôr-se a trabalhar imediatamente com os panfletos e os cartazes já aprovados, acrescentando-lhes logótipo da Coordenadora para a sua colada e reparto quando se puder.

7) A vindoura Reuniom fica convocada para a quarta-feira 14 de Fevereiro às 14,30 na Faculdade de Física.