·::.coordenadora de assembleias.::·

Acta 20 (17-10-2007)

2007-10-18T13:42:00.002Z

Assistem as assembleias de:
-História
-Ciências da Comunicaçom
-Educaçom Critica (chega tarde)
-Trabalho Social

Ler mais...

1-Turno por faculdades:
-Ciências da Comunicaçom: Reunírom-se por vez primeira neste curso na terça-feira passada no local de estudantes da sua faculdade. Som por volta de dez-doze pessoas e tenhem pensado fazer umha palestra com professores, pensam em Bermejo ou senom pode ser outro de Firgoa.

-Educaçom Critica: Sendo por volta de dez pessoas continuam com o grupo de trabalho da Escola de Direito e começárom a preparar a Semana da Educaçom Critica.

-História: Houvo umha segunda assembleia tendo umha assistência similar à primeira, entre setenta e cem pessoas. Constituírom-se dous grupos de trabalho, um para se entrevistar com o Reitor e o outro para procurar e apresentar informaçom sobre Bolonha.

2-Propostas a aprovar:

-Comissom cultural: Filsofia nom apareceu polo que nom se pudo informar do assunto. História fica encarregada de recolher informaçom na sua faculdade para apresentá-la na próxima reuniom.

-Panfleto e cartaz sobre a suba das taxas: Nom fôrom enviados aos correios polo que se continua à espera de recebê-los para poder tomar umha decisom.

3-Assembleia Geral:

Existe um grande desconhecimento sobre como vai ser a Assembleia Geral ao nom haver nengum Ponto do Dia a levar. Continuam se realizar-se as reunions dos grupos que a preparam.
Além disso, insta-se à Assembleias de cada Faculdade que realizem a maxima agitaçom possível com motivo da Assembleia Geral. Propom-se realizar grupos que vaiam polos câmpus anunciado-a atravês de faixas e informando sala a sala.

Os painéis sobre Bolonha que estavam em Ciências da Comunicaçom trasladam-se para Filosofia e pede-se que vaiam mudando de faculdade para abranger o maior numero de possíveis leitoras/es.

A próxima reuniom da Coordenadora será o dia 25 de Outubro de 2007 em História polas 14h30 (Câmpus Histórico) da USC.

Acta 19 (10-10-2007)

2007-10-10T14:53:00.000Z

Assistem as assembleias de:
- Direito
- Filosofia
- História
- Filologia
- Ciência da Comunicaçom
- Educaçom Crítica

Faltam: Trabalho Social (só ficou umha rapariga e nom assistiu), Física (reduzírom a participaçom e as pessoas que ficárom nom podem assistir), Farmácia (desfijo-se), Óptica (desculpa ausência) e Biologia (nom vinham participando). Políticas, ao igual que no ano passado, nom participou.

Ler a acta...

1. Turno por faculdades:

>>Direito: Desfijo-se. Só há umha pessoa das que estavam a trabalhar no ano passado. Tem um contacto e tentará alargar a participaçom das pessoas na assembleia. As pessoas da Coordenadora que conhecerem alguém em Direito devem tentar que participe nessa assembleia se for possível.

>>Comunicaçom: Reunírom-se nesta segunda-feira. Som por volta de 10 pessoas, embora algumhas nom estáveis. Há umha reuniom pendente. Vam organizar actividades sobre os meios de comunicaçom livres, etc.

>>Filologia: Nom se reunírom ainda. Nom há um número exacto de pessoas que vaiam participar, mas em princípio vai ser maior do que no ano anterior. Umha das pessoas novas participou na assembleia de Direito.

>>Filosofia: Há duas pessoas novas na assembleia. Falárom com o professor Bermejo para organizarem umha palestra ou debate. Também querem denunciar a corrupçom existente na Comissom Cultural da sua faculdade devido a que duas pessoas ficárom com o dinheiro da mesma e foi gerido de maneira antipopular.

>>Educaçom Crítica: Reunírom-se em História, por volta de 5 pessoas, ainda que a assembleia conta com umhas dez pessoas. Tenhem umha comissom de Escola de Direito. Estám a explorar fórmulas de autogestom. Começárom a trabalhar na organizaçom da Semana da Educaçom crítica.

>>História: Nom houvo reuniom formal, ainda que várias informais. A Decana organizou umha palestra explicando o plano Bolonha (é contra). Amanhã há outra palestra às 12h na faculdade para explicar o mesmo.

2. Propostas a aprovar:

- Comissom cultural: Proposta para que as assembleias procurem informaçom sobre a comissom cultural (se existir) na sua faculdade e tentar tirar dinheiro daí (gerindo-a de maneira assemblear).

- Cartaz e panfleto: denúncia de que a suba de taxas nom é um facto isolado e que tem a ver com a aplicaçom do processo de Bolonha. O panfleto fai-no Filosofia e envia-o aos correios antes do domingo e a Sabela (Comissom informaçom) maqueta o cartaz.

3. Assembleia Geral:

- Houvo reuniom convocada através dos correios, assistírom 10 pessoas. Decideu-se que será no 30 de Outubro na faculdade de Educaçom (Norte). A ordem do dia está pendente ainda. Haverá reunions antes.

A próxima reuniom da Coordenadora será dia 17 de Outubro de 2007 às 14h30 na faculdade de História (Câmpus Histórico) da USC.

Participa na luita contra Bolonha!

2007-10-05T12:16:00.000Z

A Coordenadora de Assembleias de Faculdade, órgao democrático, aberto e plural da USC, retoma a actividade neste ano lectivo 2007/2008. Começamos com umha primeira reuniom na quarta-feira 10 de Outubro às 14h30 na faculdade de Filosofia, que servirá como ponto de encontro dos e das companheiras que participamos no ano passado, mas também como incorporaçom de novas pessoas.
É de vital importância continuarmos a trabalhar na agitaçom e denúncia do processo de Bolonha, que vai mudar o nosso futuro, que nos atinge directamente e que se constrói de costas ao estudantado. Agora mais do que nunca, é preciso plantarmos a semente da luita estudantil!

FORA EMPRESAS DA UNIVERSIDADE!
BOLONHA É A NOSSA RUÍNA!
O ENSINO NOM É MERCADORIA!

Galiza, 5 de Outubro de 2007

Projecçom do vídeo da coordenadora no CS Revolta (Vigo)

2007-08-30T00:15:00.000Z

A segunda feira 27 de agosto fomos convidadas polas compas do CS Revolta a unha proxección de vídeos dos movimentos sociais galegos na zona vella de Vigo. E alí fomos 3 companheiras que nos puidemos achegar. Estaban tamén activistas do colectivo audiovisual olholivre, e outras video-activistas a nível individual.

Proxectáronse videos sobre diferentes temas, da asemblea de precarias de Compostela, sobre os movimentos queer, mobilizacións polos dereitos das persoas presas, contra a precariedade e a especulación e polo dereito á vivenda... e tamén sobre as loitas na USC contra o proceso de Bolonha, claro ;).
Non está demais salientar a xeitosísima cea que nos prepararon os compas da revolta, así como a hospitalidade coa que nos acolleron. Todo o noso agradecemento!

Ver fotos e algun dos vídeos que vimos.

>>> vídeos olholivre
>>> vídeos asemblea de precarias de Compostela
>>> vídeo marcha queer-precaria na Corunha (invisíveis e maribolheras precárias)

Algumhas das convocatórias do curso 06/07 em vídeo

2007-06-28T20:10:00.000Z

Algumhas imagens e sons dalgumhas mobilizaçons do curso que remata. Parabéns a tod@s as que as figérom possíveis.

Aínda que nom haja aulas, a luita estudantil continua!

Acta última reuniom da coordenadora no curso 2006/07 - 7 de junho de 2007

2007-06-07T16:48:00.000Z

Assistem as assembleias de:
- Direito
- Óptica
- História
- Filosofia
- Ciência da Comunicaçom
- Assembleia Mista (Farmácia + Trabalho Social + Filologia)
- Educaçom Crítica (chega tarde)

Ler a acta...

1. Rolda de faculdades:

>>Direito: nom se reuniu.

>>Óptica: falarom com as representantes de alunas, e vam fazer um texto reivindicativo para que estas lho passem à decana (que se nega a reunir-se com a assembleia). No texto incidirám nos seguintes pontos: que nom entre o jornal "Gaceta Universitaria" na faculdade, que nom se lhes permita a empresas privadas usar o taboleiro destinado à comunicaçom da faculdade, que nom se lhes deixe novamente às empresas privadas ponher postos de informaçom na faculdade (como já tem acontecido), que a biblioteca de alunas permita a recolhida de livros mais tarde das 18:00 (hora à que actualmente se deixa de ofrecer este serviço), e que lhes permitam usar o local de alunas. Planejavam fazer também umha palestra, que ficou adiada.

>>História: Editárom mais panfletos de apresentaçom da assembleia e os repartírom. Tiverom já a sua última reuniom até o ano que vem.

>>Filosofia: nom se reunirom. Comentam a falta de gente na acçom da semana passada. Figérom umha reclamaçom na reitoria e uns cartaces para denunciar a farsa das eleiçons, que a reitoria, em reuniom com "associaçons estudantís" decide adiar até o ano que vem.

>>Ciência da Comunicaçom: as palestras que estavam organizando (sobre contrainformaçom, rádios livres, e outras) decidírom adia-las até o ano que vem por falta de tempo nas datas dos exames.

>>Assembleia mista: reuniu-se com a ausência de Filologia, e tem umha proposta.

2. Propostas a aprovar:

- Grupo de trabalho para preparar a assembleia geral: a gente da Assembleia da Educaçom Crítica tem um grupo de trabalho que estivo trabalhando esse tema. Comentam que em caso de reunir-se, mandarám a convocatória às assembleias para elaborar umha proposta de orde do dia com os temas a debater, material publicitário, lugar, e data, para a assembleia geral.

- Grupo de trabalho do texto contra a mercantilizaçom: reunira-se no verao para faze-lo a partires do rascunho já enviado pola listagem e ter umha proposta feita a começos do curso que vem.

- Lista de correio: vai mal. Leva tudo o ano indo mal. Proposta de direito para soluciona-lo: comunicar-nos escrevendo a todos os correios de todas as assembleias.

3. Propostas novas:

- Proposta da assembleia mista: propom-se ponher umha mesa na matriculaçom das alunas de primeiro para amosar o trabalho feito polas assembleias e a coordenadora e informar sobre o processo de Bolonha e a mercantilizaçom do ensino. Poriam-se panfletos, cartaces e o video num PC portátil de ser possível. Como é a última coordenadora do ano, nom se pode baixar às assembleias e voltar a vota-lo, logo o que se propom desde a gente presente na coordenadora é comenta-lo por mail e cada umha na sua assembleia, e se nom há oposiçom tirar para adiante com a proposta, já que nom se considera que ninguém se vaia a oponher, dado o carácter da proposta, meramente publicitário. Aliás, comenta-se também que a gente que estea disposta a somar-se à acçom, se mantenha em contacto por correio electrónico. Se alguém se quere somar:

4. Rolda das faculdades que seguirám o ano que vem:

Das presentes, tam só amosam a certeça da sua desapariçom a assembleia de farmácia (durante o 1º cuatrimestre), pois das duas pessoas que participavam na assembleia, a que fica nom está disposta a asumir responsabilidades. Destacar que em Filosofia marcharám 4 pessoas que se atopavam aquí com umha bolsa Séneca, e que Direito comenta que nos primeiros dias de curso planejam fazer abundantes repartos de panfletos e algumha palestra, actividades especialmente dirigidas à gente que entra em primeiro. Instam a todas as assembleias a faze-lo.
Aliás, a Assembleia da Educaçom Crítica, ante a marcha dalgumhas das suas membras o ano que vem, vam escrever todo o que figérom e documentar os debates que tivérom com a fim de que nom se repitam o ano que vem.
Recalca-se a importância de fazer actos ao princípio do curso que vem.

Comenta-se que hoje (7 de junho) há umha manifestaçom contra a reuniom do G8 em Rostock (Alemanha) (bom, a mani é aquí, na praça de vigo às 21:30).

Estabelece-se a primeira reuniom do curso que vem: 10 de outubro, às 14:30 em Filosofia.

Quen dixo que a empresa privada estaba na Universidade?

2007-05-28T15:44:00.001Z

Podemos ver no blogue da assembleia de Farmácia, o seguinte artigo, no que se fai eco da abrumadora presença da empresa privada em todos os resquicios da Universidade. Nom há (aínda) umha privatizaçom formal da universidade, mas caberia empezar a pensar se existe já umha privatizaçom funcional...

Velaí un cartaz que anuncia (así, sen complexos) as "entidades" patrocinadoras do 150 aniversario da nosa faculdade (muitas delas emrpesas privadas), que as autoridades se esmeraron en converter nun derroche de pasta. E xa sabemos que cando se move muita pasta... algo acaba caendo... O peor é que nós colgamos un cartaz para anunciar a asemblea ou para informar sobre o proceso de Boloña e desaparece en cuestión de horas...
Ler mais...

Aquí outro cartaz que nos alenta a ser becari@s. Si, ese estatus "laboral" caracterizado pola inseguridade e o desamparo legal. E o anuncia a fundación Universidade-Empresa. No web anunciado, nun ambiente propio dun videoxogo (para facelo máis fácil) plantéxasenos unha saída fácil a inseguridade ante a falta de emprego que aniña no estudantado ao rematar a carreira. Cámbiannos esa situación pola precaridade dun traballo muitas veces non remunerado, e sen protección legal.

Acta 18 (24-05-2007)

2007-05-24T23:07:00.000Z

Acta da XVIII Juntança da Coordenadora
(24-05-2007)

Assistem:
-Assembleia Mista (Farmácia, Filologia, Trabalho Social)
-Física
-CC.da Educaçom/Educaçom Crítica
-História
-Direito
-Filosofia
-Óptica e Optometria
-CC.Comunicaçom

Ler mais...

1.Rolda de Faculdades

-Óptica

Continuam com o trabalho de limpeza da propaganda comercial dos painéis e cortiças da Faculdade.

Preparam umha palestra sobre Bolonha para o dia 6 de Junho aproximadamente.

-Física

Estivérom debatendo sobre a suspensom das eleiçons às Juntas de Faculdade.

Realizam umha crítica (reiterada) à excessiva espontaneidade com que decorrem as acçons convocadas pola Coordenadora. Seguindo esta crítica, postulam que um Grupo de Trabalho fique encarregado em cada ocasiom de determinar umha linha de percurso das marchas e trabalhar para evitar improvisaçons e desordens várias que transmitem umha imagem péssima dos protestos.

O devandito Grupo de Trabalho é unanimemente aceite e valorizado como um marco de funcionamento, polo qual nom se reconhece como proposta, e portanto nom cumpre baixar às Assembleias.

-CC.Educaçom

Concordam com a exposiçom de Física sobre o caos nas marchas.

Projectam pôr em funcionamento umha Comissom da sua Assembleia encarregada da formaçom contra o Processo de Bolonha. Esperam garanti-la para o curso que vem.

No mês de Junho, é previsível que realizem umha mesa-redonda sobre Escolas Livres.

Durante a semana que vem será exposta umha compilaçom de imagens e informaçom sobre a Semana da Educaçom Crítica deste ano. Em concreto, na quinta-feira às 12h haverá umha sessom de "petiscos críticos". Convida-se a participar.

Esta semana expugérom umha colecçom de imagens dum autor galego sobre as mobilizaçons antiglobalizaçom na Copenhaga. Lembra-se às demais Assembleias que qualquer umha das exposiçons pode ser solicitada e levada a outros centros.

-Filosofia

Concordam com a exposiçom de Física sobre o caos nas marchas.

Hoje 24 era apresentada na sua Faculdade um livro do professor Bermejo sobre a mercantilizaçom do ensino.

-Assembleia Mista

Nom se reuniu

-CC.Comunicaçom

Nada que destacar

-História

Nada que destacar

-Direito

Apresentou-se instáncia às Juntas de Faculdade, a través do Decanato, solicitando a abertura e livre utilizaçom do Local de Alunos e Alunas.

2.Votaçom das propostas feitas

-Vídeo

Sai aprovado sem votos em contra. Física aprecia porém duas emendas, que deverám ser comentadas em pessoa às pessoas que figérom o vídeo.

Também Filosofia fai umha apreciaçom.

-Texto

Nengumha Assembleia tem nada concreto que expor sobre o texto. Direito, porém, fai umha consideraçom, e é que para facilitar a redacçom dum "manifesto" da Coordenadora contra Bolonha, cumpriria encarregá-lo a um grupo de pessoas que elaborassem umha proposta aceitável em termos literários em geral e no seu conteúdo. Várias pessoas amossam-se dispostas a fazê-lo, empregando de rascunho o texto apresentado por Farmácia. Nom se considera urgente, polo qual espera-se poder defini-lo para o ano que vem.

-Convocatória de Assembleia Geral

Com 4 votos a favor sobre 7, sai aprovada a celebraçom. Espera ser convocada a começos do ano próximo e aproveitar a sua celebraçom para difundir a existência da Coordenadora e juntarmo-nos todos e todas @s que estivemos trabalhando neste curso.

3.Novas propostas

Há prevista umha derradeira acçom coordenada.

4.Vários

O dia 1 de Junho às 9h45, um estudante que participa na Coordenadora será julgado em Compostela acusado de realizar umha pintada-mural contra Bolonha. Menciona-se a título individual por se alguém puder e quiger assistir à concentraçom de apoio.

Denuncia-se a manipulaçom mediática da manifestaçom decorrida em 23 de Maio. Os meios de informaçom, que quase nom se figérom eco das nossas actividades ao longo do curso, publicitam maciçamente e com mentiras umha acçom paralela ao desenvolvimento da manifestaçom.

Denuncia-se a inédita suspensom das eleiçons às Juntas de Faculdade e a falta de informaçom ao respeito.

O googlegroups leva todo o curso funcionando mal e dando problemas. Embora umha companheira assegura poder amanhar o problema, solicita-se às Assembleias, para que nom continuem falhando os correios, que aponte os endereços de cada umha das outras (ver no web da Coordenadora) e faga um grupo ao qual enviar.

A priori, a vindoura será a derradeira Juntança da Coordenadora do presente curso. Nela espera-se alcançar um grupo para preparar o texto durante o verao e mais um outro para encarregar-se de ir perfilando a Assembleia Geral.

A vindoura Juntança da Coordenadora de Assembleias de estudantes da USC será o dia 7 de Junho, quinta-feira, às 14,30 da tarde, em Filosofia.

Intoxicaçom mediática no 23-M

2007-05-24T22:14:00.000Z

Os meios de comunicaçom ao serviço do sistema capitalista espanhol e vanguarda na manipulaçom informativa dedicárom várias alíneas no dia de hoje à Jornada de Luita em que se assinalárom os verdadeiros culpáveis e promotores do EEES na Galiza, o Banco Santander e o PSOE.

Perante a intoxicaçom e a falseaçom do que aconteceu queremos declarar que a mobilizaçom e toda a agitaçom, actividades, etc. que a Coordenadora de assembleias tem feito durante todo o ano foi ignorada polos meios de comunicaçom e usam a nossa entrada na sede do PSOE como notícia relevante quando o importante é que está aberto um processo de mercantilizaçom do ensino, do qual somos @s principais afectad@s, e ninguém em nengum momento ouviu a nossa voz nem nos perguntou a nossa opiniom.

Os meios de comunicaçom burgueses tentam criminalizar todo o movimento assemblear estudantil deixando-nos como "violent@s que arrasam umha sede eleitoral" e afirmando que as assembleias estám vinculadas a "alguns grupos de estudantes independentistas". A Coordenadora e as assembleias som órgaos plurais em que o nexo é a luita contra Bolonha e a mercantilizaçom do ensino universitário. Nelas convivemos pessoas de muitas sensibilidades políticas, do anarquismo ao comunismo e independentismo, ou sem identificaçom directa com umha determinada ideologia. Tentar, por parte dos meios de comunicaçom, vincular directamente todo o trabalho que se está a realizar com o independentismo galego é mais umha estratégia para desacreditar e criminalizar publicamente um movimento verdadeiramente democrático e rico em pluralidade.

A criminalizaçom da mocidade e, por extensom, do estudantado é umha campanha que os mass-média começárom há meses. O despertar da alienaçom a que nos tenhem submetid@s é um dos maiores "pecados" que podemos cometer. Fica aqui reiterada a nossa vontade de continuar a luitar contra Bolonha e por um ensino digno na nossa universidade. Nom calaremos nem deixaremos de assinalar os culpáveis da venda do ensino público ao melhor postor.

LA VOZ DE GALICIA, EL CORREO GALLEGO, CÚMPLICES DO CAPITAL!
NOM AO PROCESSO DE BOLONHA!

Galiza, 24 de Maio de 2007

Notícias publicadas em La Voz de Galicia e El Correo Gallego. O acto completo foi publicado em Galicia Hoxe.

Fotos da manifestación

2007-05-24T20:15:00.000Z

Ver o resto das fotos...

23-M: Jornada Europeia de Luita contra Bolonha. A crónica

2007-05-23T15:57:00.000Z

Hoje, 23 de Maio de 2007, é um dos pontos finais do ano em que se materializa todo o trabalho da Coordenadora e das assembleias de faculdade. Sem todo este trabalho, construído por todas e todos, a Jornada de hoje nom teria sucesso.
A Jornada começou desde primeira hora da manhã com piquetes de agitaçom nas faculdades informando da manifestaçom e do porquê estamos contra Bolonha e o processo de mercantilizaçom do ensino universitário.
Ler mais...
Às 12h30 deu começo a concentraçom diante da Reitoria, na praça do Obradoiro, onde nos concentramos por volta de 80 companheir@s das assembleias e faculdades. Esta foi umha das maiores manifestaçons que figemos neste ano, quanto a número de assistentes, mas também quanto à diversidade de companheir@s: de pessoas que trabalhárom desde o começo na Coordenadora até novas caras que recentemente se unírom à denúncia do EEES.
Aos 20 minutos de começar a concentraçom a Reitoria fechou as portas, impedindo-nos a entrada e evitando, como nas anteriores manifestaçons, que tentássemos aceder ao Reitor, Seném Barro, para pedir explicaçons e fazer ouvir a nossa voz.
A continuaçom, marchamos até a praça da Galiza, cortando o trânsito. Por espontaneidade popular, ocupou-se a sede do PSOE, responsável a nível estatal e galego da implementaçom do processo de Bolonha no Sistema Universitário Galego. A manifestaçom continuou até o Câmpus Sul e finalizou diante do Banco Santander presente nele com umha companheira de Física dando leitura ao manifesto que reproduzimos a seguir.
Após a manifestaçom, houvo um jantar-convívio na Gentalha do Pichel e a projecçom de um vídeo sobre a luita estudantil na Itália.
Mais umha vez, queremos da Coordenadora parabenizar o trabalho das assembleias e encorajar nesta última manifestaçom do ano lectivo a continuar a luita no próximo ano, com mais forças e energias renovadas.

A VITÓRIA É NOSSA!
NOM AO PROCESSO DE BOLONHA!

Manifesto lido pola companheira de Física:

Concentramo-nos hoje para evidenciar um conflito que foi silenciado polos meios de comunicaçom empresariais e partidistas, para protestar contra a imposiçom dumha reforma universitária que as altas instâncias do governo e da universidade se encarregárom de OCULTAR INTERESSADAMENTE, obrigadas polos seus compromissos com as empresas, E NOM COM O ESTUDANTADO.
Porque disso trata o plano de Bolonha. Quando falamos da mercantilizaçom do ensino, estamo-nos a referir a isto mesmo: à diminuiçom de bolsas, à suba de taxas, à extensom do mercado das hipotecas aos estudantado, à segregaçom laboral e precarizaçom a que se condena às tituladas de grau, à elitizaçom do ensino nuns pós-graus e masters que ninguém poderá pagar, a configuraçom de estudantes própios de cadeias de montagem expropiando o seu tempo de vida ao multiplicar o nosso tempo académico...
Nas faculdades podemos encontrar a informaçom que a USC se digna a dar-nos sobre o EEES. Uns patéticos trípticos nos quais se fala das melhoras na mobilidade, etc. ALGO QUE POR OUTRA PARTE É UM ENGANO: vendem a mobilidade como a legitimadora para a aplicaçom do EEES, da homologaçom da nossa universidade e da implantaçom dos ECTS quando esta mobilidade o que implica é que as universidades europeias tenham que competir por oferecer um serviço num mercado internacional, um serviço, entendido como mercadoria que se nutre de clientes, isto é, empresas e estudantes.
Esta competiçom dentro de um mercado único europeu polo diferentes clientes, reproduz o modelo dos Estados Unidos de América, onde se farám evidentes as graves consequências que a mobilidade conleva como a fuga de cérebros e a fuga de financiamentos dando lugar a universidades de primeira e universidades marginais. Portanto, até as vantagens que nos vendem SOM MENTIRA.
E por que fam esta reforma universitária? Para estender as regras do mercado ao ensino, convertendo o direito ao conhecimento num campo mais no que comerciar.
Isto tem como consequências, além das já citadas, QUE NA UNIVERSIDADE NOM SE VAI ENSINAR NADA QUE NOM SEJA RENDÍVEL EM TERMOS ECONÓMICOS.
Porque o ensino é um direito e nom um negócio:
NOM A BOLONHA!
NOM AO EEES!

Jornada Europeia de Luita contra Bolonha

2007-05-22T11:04:00.000Z

Nesta quarta-feira, 23 de Maio, queremos convocar a todo o estudantado, as nossas e nossos companheiros, a unir-se, mais umha vez, à luita contra Bolonha e contra a mercantilizaçom e elitizaçom do ensino público.

Para isto temos umha manifestaçom convocada às 12h30 na Reitoria (Praça do Obradoiro). Após a manifestaçom, haverá um jantar às 14h30 na Gentalha do Pichel (Rua Santa Clara) e projecçom de vídeos das luitas contra Bolonha noutros países da Europa.

PAREMOS A MERCANTILIZAÇOM DO ENSINO!
A USC NOM SE VENDE!
REITORIA DEMISSOM!

Acta 17 (16-05-2007)

2007-05-16T17:47:00.000Z

Acta da XVII Xuntanza da Coordenadora de Asembleas da USC

(16-05-2007)

Assistem:
- Físicas
- Assembleia mista (Farmácia + Trabalho Social)
- Ciência da Comunicaçom
- História
- Educaçom Crítica
- Óptica e Optometria
- Direito
- Filosofia

Ler mais...

1. Rolda de faculdades:

>>Filosofia: comentam que se achegou à assembleia um rapaz que está de erasmus aquí e estuda em portugal, onde já está muito mais avançado o implentamento das medidas que implicam o processo de Bolonha. Digerom-lhe de fazer umha palestra. Comentam a possibilidade de realiza-la o 23 de maio, com motivo da jornada europeia de luita contra o EEES.
Tenhem o projecto de tirar umha revista autogestionada (sem subvençons da universidade), e falarom com outra gente de Filosofia que tem em mente também a realizaçom dumha revista.
Tiverom problemas para pendurar umha faixa na faculdade. Falarom com o decano, que num primeiro momento lhes puxo trabas, pero ao final accedeu. Comentam que nom se esperavam este tipo de trabas à hora de organizar-se.

>>Físicas: sem novidades.

>>Assembleia mista (Farmácia + Trabalho Social): reuniu-se para debater os pontos da coordenadora. Nom apareceu Filologia (também actualmente com menos de 3 integrantes).

>>História: fizerom uns colantes com o lema "Vende-se a USC. Consultar em reitoria". Também umhas brochuras explicando o que é a assembleia, e outras sobre o processo de Bolonha. Planejam seguir empregando este método de difussom e realizar mais brochuras.
Realizárom um ciclo de cinema de combate.
Andam planejando um roteiro pola faculdade para retirar toda a publicidade de empresas privadas.
Criárom um blogue: assembleia-argehi.blogspot.com. Pidem que se introduza no blogue da coordenadora.
A semana que vem acolherám na sua faculdade a exposiçom que realizou Ciência da Comunicaçom sobre o processo de Bolonha. Comentam que a vindoura assembleia que queira a exposiçom que se ponha em contato com elas.

>>Ciência da Comunicaçom: tenhem em preparaçom umha palestra sobre rádios livres.

>>Educaçom Crítica: andam a trabalhar nas comissons de escola popular, de escolas livres, de difussom. Pretendem criar umha comissom-escola de direito.

>>Óptica e Optometria: informam de que tenhem - tinham - o taboleiro de alunas ocupado por empresas privadas e procederom a arrincar tudo.

>>Direito: falárom da apressentaçom de candidaturas às juntas de faculdade em nome da assembleia. Vam-se apressentar. E decidírom que a gente que trabalhe noutra organizaçom ademais da assembleia de direito se vai apressentar por: "assembleia de direito/organizaçom".

Neste momento umha companheira de Físicas que é junteira di que receveu um correio da reitoria no que comunicavam que as eleiçons se adiam para o ano que vem, por decissom da reitoria junto com "organizaçons de estudantes". Nom se sabe quais...

Em direito ademais do comentado, seguem a ver se podem fazer uso do local de alunas, já que o decanato se empenha em nom permitir-lhes o accesso.

2. Votaçons de propostas passadas:

*1. Trabalhar a partir de agora com maioria absoluta necessária que saiam adiante as propostas na coordenadora. Físicas planteja dúvidas acerca da formulaçom da proposta. Se muitas assembleias nom se reunem nom podem votar (em lugar de votar nulo). . Propon-se votar a proposta com a emenda de que as assembleias que nom se reunam nom votem (em lugar de abster-se, como faziam até o momento) e com a matizaçom de que o cómputo da maioria absoluta fique estabelecido na metade das assembleias que se reunirom mais 1.
Votaçom: 6 a favor, 1 abstençom, 1 em contra. APROVADO.

*2. Assembleia Geral Extraordinária: vota-se em primeiro lugar se se realiza ou nom. 4 a favor, 4 em contra. Nom se vota já a proposta de orde do dia de Educaçom Crítica. E como nom se sabe que fazer, procede-se a votar o resto de propostas e deixar o debate para o final.

*3. Texto sobre Bolonha. Vota-se a semana que vem. Comenta-se a existência de emendas.

>>neste momento filosofia comenta que nom receve as mensagens listagem da coordenadora óptica tampouco a comissom de informaçom se por enterada<<

*4. Video sobre a coordenadora: vota-se também a semana que vem, porque polo apontado antes, há assembleias que nom tivérom oportunidade de ver o vídeo. Comenta-se também a existência de emendas (Ciência da Comunicaçom): que parem mais tempo as letras, e que se vejam milhor.

3. Propostas:

- Ciência da Comunicaçom comenta que para a jornada de luita contra Bolonha (23 de maio) está a preparar umhas actividades. Depois da coordenadora, quedam as pessoas interessadas para somar-se à iniciativa e colabourar. Pide-se que se informe nas assembleias porque se necessita gente.

- Baixar às assembleias as propostas de TEXTO e VIDEO.

4. Debate sobre a assembleia geral extraordinária e os foros de debate:

(debate)
Depois dum intenso debate propom-se como soluçom que se comente nas assembleias o debate e que se comente também o dato estimado durante a coordenadora de que a maioria das pessoas que estám a trabalhar nas assembleias está a favor da realizaçom da assembleia geral extraordinária (52 frente a 31, aproximadamente, segundo as estimaçons aportadas polas representantes de assembleias), com a intençom de chegar ao consenso.

A vindoura coordenadora fica datada para a Quinta-feira 24 de maio às 15:00 em Físicas.

Acta 16 (10-05-2007)

2007-05-14T15:11:00.001Z

Acta da XVI Xuntanza da Coordenadora de Asembleas da USC

(10-Maio-07)

Asisten:
-Farmacia
-Traballo Social
-Educaçom Crítica
-Dereito
-Física
-Óptica
-CC.Comunicación
-Historia
-Filosofia

Asiste pola primeira vez a Asemblea de Faculdade de Filosofía
Reitera ausencia Filoloxía.

Ler mais...

1.Votación das propostas da convocatória XV (extraordinaria)
(para seguir, ollar a anterior Acta):

PROPOSTAS:

Física
ponto1 - 5 votos a favor, 1 en contra, 3 abstencións - APROBADO

ponto2 + Dereito ponto1 - 7 votos a favor, 2 en contra - APROBADO
4 votos a favor dun mínimo de 3 membros; 3 votos a favor dun mínimo de 5

ponto3 - 6 votos a favor, 1 en contra, 2 abstencións - APROBADO

ponto4 - non pode ser un ponto de Regulamento porque a soberanía recae nas Asembleas. Abre-se un debate no cal a suxestión de que se faga como pedía Física é defendida por esta Asemblea, mentres Educaçom Crítica defende a autoxestión e Historia posiciona-se pola apresentación de candidaturas para accder a fondos mais sen participar das Xuntas de Faculdade.

Historia
ponto1 - 4 votos a favor, 4 en contra, 1 abstención - REPETIRÁ-SE VOTACIÓN A SEMANA VINDEIRA. SOLICITA-SE ASISTENCIA DE TODAS AS ASEMBLEAS CON VOTO AO RESPEITO.

Farmacia
ponto1 - 4 a favor, 1 en contra, 4 abstencións - APROBADO

ponto2 - 2 a favor, 7 abstencións - APROBADO

CC.Comunicación
ponto1 - 7 a favor, 2 abstencións - APROBADO

2. Informe da Comisión de Información

Proposta de texto e vídeo. Nos correos. Solicita-se contribución crítica das Asembleas para facer un bon texto con emendas.

3. Propostas a baixar

-Historia:
Introducir no Regulamento Interno a aprobación por maioría absoluta de todas as decisións que se tomen.

-Física:
23 de Maio, Xornada de Luita Europea contra Bolonha. Cumpre facer propostas para ese día.

4.Varios

Historia remata hoxe Ciclo de Cinema da Asemblea.

A seguinte Xuntanza da Coordenadora será às 15 horas do día 16 de Maio en Filosofía.

Lembra-se que a partir de agora, por decisión democrática, as Xuntanzas da Coordenadora serán semanalmente.

Acta 15 (03-05-2007)

2007-05-04T20:04:00.000Z

Acta XV Juntança da Coordenadora (extraordinária) Modificaçons do regulamento

(3-5-2007)

Assistem:
-Farmácia
-Trabalho Social
-Educaçom Crítica
-Direito
-Física
-Óptica
-CC.Comunicaçom
-História

Ler mais...

Salienta-se a ausência reiterada de Filologia.
Falta Acta XIV, que tomava História. Urge envio (solucionado no momento da publicaçom desta acta).
A Assembleia de Filosofia reunia-se precisamente na data da presente Acta; comenta-se que nesta reuniom decidiriam se aderem à Coordenadora.

A Ordem do Dia ficou estabelecida, por tratar-se dumha Juntança de carácter extraordinário, com um único ponto: propostas de melhora do funcionamento interno por cada Assembleia. Unicamente salientar que Educaçom Crítica tem um grupo de trabalho interno que cumpre umhas funçons similares às que a Coordenadora asignou à Comissom Jurídica.

Som portanto, as que seguem, as propostas que cumpre baixar às Assembleias de Faculdade. Após as votaçons, a semana que vem reunirá-se de novo a Coordenadora com carácter extraordinário para determinar, em funçom das votaçons, as modificaçons a introduzir no Regulamento Interno.

-Óptica
1.-Proposta de criar Assembleias mistas (sem definir)

-Física
1.Periodicidade semanal das Juntanças da Coordenadora para dotá-la de maior operatividade.

2.Criaçom de Assembleias Mistas de Faculdades para que podam ter voz e voto na Coordenadora a través delas as Assembleias que nom alcancem 3 pessoas. O principal trabalho das Assembleias Mistas será a constituiçom de Assembleias de Faculdade (mínimo 3 pessoas).

3.Os debates realizarám-se em convocatórias extraordinárias para evitar que as reunions (semanais segundo proponhem) desvirtuem o conceito da Coordenadora.

4.Funcionamento económico: as pessoas integrantes das Assembleias participantes na Coordenadora asseguram a apresentaçom de candidaturas pessoais em nome da Coordenadora para tentar aceder aos fundos públicos que dá a USC.

-História
1.Convocatória dumha Assembleia Geral na qual se modifique o Regulamento

-Trabalho Social
1.-Propostas já expostas por outras Assembleias

-Farmácia
1. (engadido ao ponto 2 de físicas) Recomendaçom do mantemento do trabalho interno no centro de cada quem (aínda que participe na assembleia mista) convocando periodicamente assembleias (cada 2 semanas), para considerar que nesse centro há umha assembleia que forma parte da coordenadora e permitir às alumn@s do centro incorporar-se a assembleia mista ou assembleia de centro de superar o número de pessoas mínimas para se constituir como tal.

2. (engadido ao 3 de físicas) A representaçom nos debates nas convocatórias extraordinárias nom será por assembleias, mas individual de cada um/ha d@s assistentes.

-Educaçom Crítica
1.-Concorda com o ponto de História, mas concretiza com Ordem do Dia de Assembleia Geral que será enviada aos correios.

-CC.Comunicaçom
1.Incluír nas Ordens do Dia a avaliaçom dos actos que se tenham realizado em nome da Coordenadora.

-Direito
1.A mesma proposta que o ponto 2 de Física, mas impondo um mínimo de 5 pessoas

A vindoura Juntança da Coordenadora será a quinta-feira dia 10 de Maio às 14,30 horas na Faculdade de História.

Acta 14 (26-04-2007)

2007-05-04T15:00:00.000Z

Acta XIV Xuntanza da Coordenadora de Asembleas da USC

(26-4-2007)

1. Rolda de faculdades:
- Física , reuníronse en asamblea e trataron o tema do mal funcionamento da coodenadora.
- Dereito, o mesmo.
- Historia, reuniuse en asamblea e tratou o tema da coordenadora e que van sacar unhas pegatas.
- E.Crítica:reuníronse e trataron o tema da coordenadora e mais o desenvolvemento das xornadas, tamen trouxeron propostas pra coordenadora, tamen propoñen unha Asamblea xeral extraordinaria.
- Optica: reuníronse en asamblea.
- C.C. da Comunicación: reuníronse en asamblea e trataron o tema de facer unha palestra con mestres da súa faculdade, que precisaban 50 persoas pra preparar o acto pra o xoves próximo pola liberdade de expresión, e tamen falaron de facer unha asamblea xeral extraordinaria.

Ler mais...

2. Votación para acordar a celebración ou non da asamblea xeral
extraordinaria:
>>>Gaña o SI por 4 votos contra 3.

A Asamblea da Educación Crítica propón unha data e unha hora pra a celebración
da Asamblea xeral e pra baixala ás asambleas das faculdades.(14 de Maio ás
16:30)

Debátese sobre se a celebración da asamblea xeral levaría a unha posible
disolución da coordenadora.

Física di que abandona a coordenadora.

Historia retráctase e pide mudar o seu voto por entender mal o que se tiña
que votar.

Permítese a Historia mudar o seu voto e a votación fica en 4 votos en contra
e 3 a favor da asamblea xeral.

Queda votado que non se celebrará a Asamblea Xeral extraordinaria.

3. Propostas:
- Farmacia: están a facer un texto pra pendurar na rede sobre o
Plano de Bologna.
- Historia propón traer propostas pra vindeira coordenadora, pra mellorala nos aspectos de regulamento , organización e representación.
- Farmacia: propon o mesmo pero matiza que se faga no marco da coordenadora das asambleas.
- E.Crítica: propon o mesmo.

O resto das faculdades presentes o corroboran e apróbase traer propostas das asambleas das faculdades pra por en común o vindeiro día 3 de maio ás 14:30 na Faculdade de C.C da Educación do Campus Norte (Data fixada pra a celebración da vindeira xuntanza da Coordenadora de Asambleas da Faculdades).

Vindeira xuntanza da Coordenadora de Asambleas : Quinta feira (xoves) 3 de
Maio na Faculdade de C.C. da Comunicación , no Campus Norte ás 14:30.

Outra asemblea! Agora en Filosofía

2007-04-28T14:37:00.000Z

Na mesma semana asistimos á creación de 2 asembleas. O mércores 25 de abril era en Óptica e Optometría, e o xoves 26 de abril foi Filosofia. Tamén crearon un blogue, no que podemos ver xa unha grande actividade. No web podemos atopar xa unha crónica do debate sobre bolonha desenvolvido na noite formativa de físicas, textos de formación, o regulamento interno da asemblea, e muitos outros artigos interesantes. Recomendamos dar un paseo polo blogue, que non ten desperdicio.
Parece que isto crece... PARABÉNS, COMPANHEIRAS!

assembleiafilosofia.blogspot.com

A assembleia de óptica e optometria fica finalmente constituida

2007-04-25T14:28:00.000Z

Tal e como indicávamos fai uns dias, a assembleia de óptica e optometria ficou hoje finalmente constituida, a pesar de que no lugar no que estava convocada desde hai uns dias a assembleia foi tomada pola empresa "multiópticas". A assembleia naceu assi, com umha evidência descarada da presença das empresas privadas na universidade. No seu blogue publicarom a acta da primeira juntança (ver aquí), e nom sabemos se foi justamente pola presença desta empresa, que na acta salienta-se especialmente a necessidade de luitar contra o processo de Bolonha.

Parabéns, companheiras!

A Senén Barro parécelle que pagamos pouco

2007-04-23T18:13:00.000Z

O reitor vai introducindo nos medios de comunicación empresariais a ideia das suba das taxas...

O reitor da USC avoga por aumentar o prezo da matrícula

Senén Barro aposta por conceder un maior número de bolsas.
«A USC é a mellor Universidade de Galicia»

O reitor da Universidade de Santiago de Compostela (USC), Senén Barro , avoga por aumentar o prezo da matrícula anual que rolda máis ou menos ao redor dos 600 euros e de conceder un maior número de bolsas para aqueles estudantes sen os recursos suficientes.

Ler mais despropósitos...

Nunha entrevista a EFE, Barro indicou que o prezo que pagan os estudante representa «entre o 10 e o 20 por cento do custo real» da formación universitaria.

Opinou que se trata dunha contribución «simbólica» e considerou que «podería aumentarse máis a matricula» ata o punto de que «sería ata un sistema mais xusto desde un punto de vista de distribución de recursos» e constituiría unha «fórmula mellor».

Observou que ese incremento debería ir «evidentemente compasado dun aumento significativo das bolsas» para compensar a aquelas familias con falta de recursos.

O reitor da USC sinalou que «dese modo o estudante con máis recursos poderá pagar unha parte máis significativa do custo da súa formación».

Barro indicou que «importantes economistas consideran que esta fórmula, existente en varios países», entre eles España, de ofrecer matrículas relativamente baratas «é absolutamente inxusta porque a Administración financia a familias sen problema económicos de xeito inxustificado».

O reitor da USC indicou que a reforma universitaria aplicada na Unión Europea implicará que o próximo curso os estudantes doutros países comunitarios xa non necesitarán facer o exame de selectividade para acceder.

Por iso, considerou que «vai haber un incremento importante de de estudante de Europa, especialmente de Portugal, particularmente en titulacións de Farmacia e Medicina» como parte desa reforma.

Barro indicou que actualmente os estudantes estranxeiros que efectúan a «titulación completa» da súa gradación na USC representan «menos do 5 por cento», aínda que subliñou que os de doutoramento supón «o 15 por cento».

«A maioría son de Portugal, unha parte significativa proceden de Latinoamérica e logo doutros países», comentou o reitor.

tirado de lavozdegalicia

Acto sobre o processo de Bolonha e o EEES na Semana da Educaçom Crítica

2007-04-23T17:29:00.000Z

Na Quinta-feira passada, companheiras de História, Física, Filologia e Farmácia assistírom à mesa redonda aberta sobre o EEES e o processo de Bolonha organizada polas companheiras da Asemblea da Educación Crítica. Acudírom ao encontro para apontar os argumentos que se estám a usar desde as Assembleias e a Coordenadora contra este processo mercantilizador do ensino. Estavam também presentes representantes da organizaçom estudantil da esquerda independentista, AGIR. Aliás, também estava convidado o vice-reitor de Oferta Docente e Espaço Europeu de Educaçom Superior. Mas afinal o vice-reitor ficou doente o dia anterior e nom pudo assistir...
Ler mais e ver as fotos...

E também nom podia enviar ninguém porque "ninguém tinha a competência suficiente sobre o tema para vir falar dele". Umha evidência mais do desconhecimento do processo de Bolonha na comunidade universitária em geral (nom só no estudantado, senom também nos órgaos de governo da Universidade...). Também estava convidado um professor que finalmente nom pudo assistir.

Perante a ausência de posturas favoráveis ao EEES na mesa, o acto ficou numha conversa entre as assistentes (umhas 25 pessoas), em que tratamos diversos temas em torno ao ensino: marcantilizaçom e mudanças nos estudos sob o EEES, baixos níveis de participaçom do estudantado, necessidade de redes de auto-informaçom, as consequências do EEES e a aplicaçom da livre mobilidade de capitais nas universidades da "periferia europeia" como a galega, etc.

Queremos parabenizar as companheiras da Assembleia da Educaçom Crítica, participantes também da Coordenadora, por contar connosco no acto referido, assim como pola organizaçom de actos tam interessantes como os inseridos na XXII Semana da Educaçom Crítica.

Também, aguardamos que o vice-reitor de Oferta Docente e Espaço Europeu de Educaçom Superior se recupere da sua "gripe" e podamos coincidir con ele noutra ocasiom para falar um bocado e trocar ideias sobre o processo de Bolonha.

Actividades da Assembleia de Ciência da Comunicaçom para esta semana

2007-04-22T15:50:00.000Z

As companheiras da Assembleia de Ciência da Comunicaçom informam-nos das actividades que tenhem organizadas para esta semana que entra:

>>EXPOSIÇOM SOBRE O EEES: Durante a vindoura semana poderás infomar-te sobre o processo de Bolonha nos dous painéis informativos que se situam diante da biblioteca da faculdade de Ciência da Comunicaçom. Posteriormente, estes painéis moverám-se por todas as faculdades que o desejarem até final deste ano lectivo.

>>PALESTRA SOBRE O EEES: Esta Terça-feira (martes) 24, às 10h30 celebrará-se umha palestra informativa sobre o Processo de Bolonha no Auditório da faculdade de Ciência da Comunicaçom. Ao acto assistirá Enrique Castelló, como representante do decanato, e o professor Manuel Outeriño. A assembleia de Ciência da Comunicaçom espera a confirmaçom da assistência dumha pessoa da Vice-reitoria de Assuntos Exteriores da USC. A duraçom máxima será dumha hora e meia. Começará com a exposiçom de cada umha das conferenciantes, na qual também participará a Assembleia. A continuaçom iniciarám-se uns turnos de questons em que intervirá o alunado presente no acto.

Umha noite de formaçom em Física

2007-04-21T17:55:00.000Z

A assembleia de Física, participante na Coordenadora de Assembleias, organiza umha noite de formaçom na sua faculdade. O programa é:

20:00 >> palestras sobre o plano de Bolonha, a cargo da Decana da faculdade e outr@s professor@s da universidade.
22:00 >> debate aberto sobre Bolonha
00:00 >> obradoiros para o activismo (maquetaçom de cartazes em software livre, confecçom e colocaçom de faixas...)
1:00 >> projecçom de filmes sobre movimentos estudantis.

A assistência é aberta. Só há que levar ceia... O café já o ponhem as companheiras da assembleia de física, :).

Mais fotos na concentraçom na Reitoria

2007-04-21T16:14:00.000Z

Ver mais fotos...

Reunindo-nos diante da Reitoria...

Estamos dentro!

Indo polo Franco

Na rua da Senra

Assentada na praça da Galiza

e depois, saímos correndo

Assentada a cortar o trânsito

Leitura do manifesto e despedida

Crónica da concentraçom na Reitoria

2007-04-18T19:05:00.000Z

A concentraçom começou na Reitoria da USC. Ao pouco tempo de chegarmos as manifestantes, entramos no edifício com a intençom de que o acto nom passasse desapercebido e de que a equipa reitoral se inteirasse bem de que há estudantes mobilizadas contra o processo mercantilizador que vive hoje por hoje o ensino superior. Demos várias voltas berrando consignas, tanto polo andar inferior como polo superior, batendo em todas as portas para ver se atopábamos ao Reitor Seném (que algumha dixo que estava agachado sob a mesa pola tormenta que lhe podia cair em cima).

Ler o resto da crónica...

Depois de um par de visitas à Reitoria, ficamos um bocado no Obradoiro gritando as nossas denúncias ao vento, o que parece que interrompeu a visita de muitos turistas (que olhavam para nós assombrados) à idílica cidade-marca compostelana.
Quando nos cansamos, partimos pola rua do Franco com a intençom de acabar a concentraçom na praça da Galiza. Ali alguns músicos de rua mostrárom-nos a sua simpatia, tocando o "Bella Ciao", o que nos subiu ainda mais os ânimos. Quando chegamos ao final da Zona Velha, viramos à praça da Galiza, onde ainda estivemos uns minutos gritando no banco Santander: "Fora o Santander da USC". Depois de um par de voltas pola praça da Galiza (parece que esta foi a concentraçom das voltas, nom figemos mais que caminhar em circulo... :)), e um par de sentadas durante as quais cortamos o trânsito, para evidenciar a invisibilidade nos meios empresariais da nossa luita, lemos o manifesto e para casinha todas.
Mais gente que nunca acudiu às concentraçons (umhas 50 pessoas) entre a que pudemos ver muitas caras novas, de faculdades que nem tenhem ainda assembleia. Assim, animamos às novas companheiras a somar-se ao movimento estudantil assemblear.
Estamos a fazê-lo bem!

Boas novas!

2007-04-18T17:03:00.000Z

Chega aos nosos ouvidos que en Óptica temos compañeiras a se mover para criar unha asemblea nesta faculdade. Mesmo teñen un blogue!:

asembleaoptica.blogspot.com

A convocatoria da asemblea centra-se en que compre reivindicar "dous puntos básicos": "a organización e movilización contra o proceso de Boloña", e a esixencia ao "Ministerio de Educación e Ciencia a equiparación da nosa carreira a unha licenciatura". Ademais, amosan a sua disposición a participar de actividades conxuntas con outras asembleas na coordenadora.

A primeira reunión é o mércores que ven (día 25 de abril) ás 12:00 no local de alumnas.

Os nosos parabéns e un saúdo ás compañeiras que están a promover esta iniciativa.

O movimento estudantil asemblear expándese!